تفكيك1 # الحرب والانتحار والمؤامرة

شعور اﻹنسان بحالة تهديد دايمًا (وجود مؤامرة) يخلق حالة دفاعية مستمرة، يلجئ فيها اﻹنسان لحالة جمود تعميه عن محاولة تفكيك المشهد قدامه، واللجوء دايمًا للرد العنيف الشديد اعتقادًا انه ده الصواب واللي هيحمي اﻷفكار والمعتقدات، وهو في كثير من اﻷحوال بيعرض لكثير من اﻷخطاء وقد يهدم ويضر اﻷفكار المراد الدفاع عنها من اﻷساس.

الكتابة دي هي محاولة لمشاركة شوية أفكار عندي أعتقد أنهم مترابطين، وإن كنت عاجز اني اوضح الرابط او اوصل بينهم بشكل سلس يخرج بالاستنتاجات اللي أقصدها، وممكن التعامل معاهم كقطع منفردة ومستقلة في حد ذاتها. 

المواقف دي في البداية انا كنت بشوفها كصور وقوالب جاهزة، ليها سبب ونتيجة وحكم ثابت على طول، وده كان بيعميني عن التفكير النقدي ومحاولة فهم الدوافع، والاعتقاد أن الشر أو الخطأ وعدم الفهم هو المحرك في حد ذاته، لا أسباب أخرى.

وصفة للقتل السهل

سؤال شغل بالي لفترة طويلة وأرقني، وهو ازاي اﻹنسان عنده القدرة على القتل، وتحديدًا في حالات قتل مدنيين أو قتل واسع (الحرب النووية)، وبعد بحث وقراءة وصلت لكتاب “حيونة اﻹنسان – ممدوح علوان” بيشرح فيه ازاى بيحصل قتل منظم.

وده بيكون خطواته في إيجاز مخل مني، انه يكون فيه خطوات كثيرة بتبعد بين المُنفذ والهدف (استخدام الطيران الآلي، أسلحة عن بُعد)، وانه يكون كل شخص مشارك في جزء، (واحد بيسوق العربية، تاني بينقل سلاح، ثالث يقوم بالقنص)

ونقطة مهمة، هي تصوير الهدف انه بعيد عن اﻹنسانية، تصوير انه البشر هناك دول شوية صراصير، وانهم بيعملوا كذا وكذا (مجموعة أفعال مستهجنة)، وانهم همج، وأقرب للحيوان.

وبعد التجريد من اﻹنسانية، بيكون سهل التنفيذ أكثر بدون تفكير مرتين، مصحوبًا بمشاعر فخر وانجاز، لا تردد وشعور بالذنب، وكروب ما بعد الصدمة.

وهنا بفتكر أحاديث وأقاويل عن وقت الحروب انه مفيش قتل لغير المعتدي، ولا للأطفال، ولا النساء، باﻹضافة للآية ﴿ وَقَاتِلُوا فِي سَبِيلِ اللَّهِ الَّذِينَ يُقَاتِلُونَكُمْ وَلَا تَعْتَدُوا إِنَّ اللَّهَ لَا يُحِبُّ الْمُعْتَدِينَ ﴾ [البقرة: 190]”.

واللي اعتقد انه كل ده دعوة لمحاولة الحفاظ على جزء من اﻹنسانية في وقت يكون فيه اﻹنسان شديد العنف والتطرف من أهوال الحرب.

فخ الانتحار والتكفير

في محاولة للترهيب من فعل الانتحار وقع الكثير في فخ تكفير المنتحر، بدون اي استناد حقيقي، واللي أصبح بناء عليه فيه عنف ضد الشخص المنتحر وحكم عليه ونبذ يتمثل مثلًا في (عدم جواز الصلاة عليه).

وبنشوف دايمًا حالة من الجدال بين الترحم عليه أو لا، وهو جدال عديم النتيجة أو الفائدة، وبيضر أكثر مما ينفع، ويزيد الوصم والعار،  بدلًا من محاولة تفكيك وفهم المشكلة في حد ذاتها، والتوعية بالمرض النفسي، والدفع في خلق حالة احتضان مجتمعية وبيئة صحية أكثر. 

أنا خلصت أول محاولة لمشاركة أفكاري، وأتمنى دايمًا أننا نوقف ونفكر في كل زاوية من اﻷحداث واﻷفكار بدون أي تصورات ونتائج مُقولبة ومُعدة سابقًا.

العمل من المنزل بأمان

#خليك_في_البيت ده شعار العالم حاليًا في مواجهة أزمة وباء كورونا، وعشان الحياة تستمر اتجهنا لبدائل سواء لعقد اجتماعات العمل على الانترنت، أو للدراسة.

وزيادة وجودنا على الانترنت أكثر، بتزيد معاه المخاطر اللي ممكن نتعرض لها، في التدوينة دي هتكلم عن الاجتماعات meeting والتطبيقات اللي ممكن نستخدمها، وعن خدمة VPN خاصة ورخيصة وآمنة، وعن نصائح عامة. 

الاجتماعات على الانترنت

zoom هو أول اسم بيجي في بالك غالبًا لما تفكر في اجتماع اونلاين، وهو تقريبًا أكثر تطبيق زادت نسبة استخدامه من وقت اﻷزمة بشكل مطرد.

ولكن ظهرت تحذيرات من استخدام zoom لإنه ممكن يعرض مستخدميه للإختراق، وشكوك في انتهاكه للخصوصية، ومشاركة البيانات، وبناء عليه يفضل تجنب استخدامه، واﻹتجاه لبرامج بديلة.

لذلك، جيتسي jitsi هو البديل اﻷفضل وده لانه مجاني ومفتوح المصدر، متوافر لكل انظمة التشغيل، أو عن طريق المتصفح، ويعمل بدون الحاجة للتسجيل، ودي المميزات واﻹمكانيات المتوفرة فيه.

  • تقدر تسجل recording الجلسة كلها
  • مشاركة الشاشة Screen sharing
  • مشاركة فيديو من youtube
  • استخدامه في بث مباشر
  • استخدام كلمة سر للمشاركة

مصادر وتقارير عن زووم، تويتة 1، 2، nytimes، inc، Cbs, Smex, Hacker news

الشبكة الافتراضية الخاصة VPN

فيه عدة خدمات موثوقة منها بتقدم VPN لكن غالبًا بتكون التكلفة عالية، وعشان كدة أنا بنصح دايمًا انه كل مجموعة أو شركة يكون عندهم VPN خاص بيهم، وده سهل تقنيًا، عن طريق برنامج Outline من خلاله هتقدر تعمل خادم خاص وبسعر رخيص نسبيًا 5$ لمتوسط 5-10 مستخدمين. 

ده شرح يوتيوب مدته 7 دقائق ازاي تعمل خادم خاص، وعلى موقع البرنامج فيه نسختين، Outline Manager وده برنامج إدارة الخادم server، وبرنامج Outline client للاتصال بالخادم

نصائح عامة

  • حدث نظام التشغيل والبرامج دايمًا بشكل دوري
  • استخدم اضافة المتصفح https everywhere
  • متفتحش اي لينك مش متاكد منه
  • استخدم كلمات سر مختلفة
  • استخدم مدير كلمات سر Password Manager

لو عندك اي بدائل او اقتراحات او اسئلة سيبها في التعليقات

بالبيچاما – تمارين وحفلات وكورسات ببلاش من البيت (محدث)

من أيام اعتبرت منظمة الصحة العالمية “الكورونا covid19” وباء، وعليه كان من أهم النصائح هي إلغاء التجمعات للحد من إنتشار المرض، وبالفعل فيه دول شبه فرضت حظر تجوال، وألغت التجمعات للحد من إنتشار المرض.

بس التغيير المفاجئ في الروتين ده ممكن يكون صعب على ناس كتير، أنا منهم، وعشان كدة أنا بكتب التدوينة دي، فيها تجميعة عن عروض ممكن نستفيد منها، وحاجات نقضي فيها وقتنا خلال الفترة الحالية، والقائمة دي هتكون محدثة دايمًا، وهي بتضم (رياضة – شغل – تعليم – مزيكا – سينما – أكل 😀 )

استغل الوقت المتاح، وافتكر انه الفرص دي كلها مؤقتة، بلاش تأجيل 😀

متابعة قراءة “بالبيچاما – تمارين وحفلات وكورسات ببلاش من البيت (محدث)”

بعد سنتين، ليه أنا نباتي؟

بعد سنتين، ليه أنا نباتي؟

النهاردة أنا كملت سنتين نباتي Vegetarian، مباكلش أي لحوم أو أسماك، ومؤخرا بحاول أقطع تمامًا المنتجات الحيوانية زي اﻷلبان والبيض، والمنتجات اللي داخل في صناعتها أثر حيواني زي بعض منتجات العناية الشخصية، أو الملابس.

في التدوينة دي انا هحاول أجمع افكاري واقول ليه انا عملت كدة، وليه شايف ده مهم، ومستني أوصل لفين تاني؟

متابعة قراءة “بعد سنتين، ليه أنا نباتي؟”

تجربة تحضير برجر نباتي

تجربة البرجر النباتي

من أول لما بدأت اكون نباتي، البرجر كان من الحاجات اللي مفتقدها، والبدائل المتوافرة في اﻷول كانت قليلة ومحدودة، لكن زادت في 2020 وبقا فيه خيارات متنوعة ممكن بيها تأكل برجر بيتراوح سعره ما بين 40 جنيه لغاية 150 جنيه تقريبًا.

ورغم ده، تجربة البرجر منزليًا مختلفة وليها طعم مختلف، لأني ضامن المكونات أكثر وعاملها بأيدي، والتكلفة رخيصة جدًا، وبعد ما عملت البرجر، وغسلت كل اﻷطباق، حسيت بشعور ايجابي جميل :’D

متابعة قراءة “تجربة تحضير برجر نباتي”

أمان الموبايل في خطوات سهلة

الحفاظ على الخصوصية والأمان أثناء وجودنا على الشبكة، من الموضوعات الصعبة، وبتحتاج مراجعة، وتطبيق، واهتمام دوري، ويمكن ده صعب أحيانًا على المستخدم في عصر اﻹنترنت السريع.

الفترة السابقة أنا مريت بعدة تجارب، منها سرقة الموبايل الخاص بي، ومنها تجارب لأصدقاء تعرضوا للسرقة والابتزاز، وده أدى بيا للتفكير في سؤال ايه هو الحد اﻷدنى من الخطوات اللي ممكن ألتزم بيها وتضمن ليا مستوى من الأمان؟، وده اللي بحاول أكتب عنه النهاردة باختصار.

أقرا المزيد ..