أمان الموبايل في خطوات سهلة

الحفاظ على الخصوصية والأمان أثناء وجودنا على الشبكة، من الموضوعات الصعبة، وبتحتاج مراجعة، وتطبيق، واهتمام دوري، ويمكن ده صعب أحيانًا على المستخدم في عصر اﻹنترنت السريع.

الفترة السابقة أنا مريت بعدة تجارب، منها سرقة الموبايل الخاص بي، ومنها تجارب لأصدقاء تعرضوا للسرقة والابتزاز، وده أدى بيا للتفكير في سؤال ايه هو الحد اﻷدنى من الخطوات اللي ممكن ألتزم بيها وتضمن ليا مستوى من الأمان؟، وده اللي بحاول أكتب عنه النهاردة باختصار.

تشفير الموبايل الكامل Full Disk Encryption 

خاصية تشفير الموبايل بالكامل من أهم الخطوات في أمان الموبايل، وبتفعليها بيكون صعب الوصول لأي بيانات على الموبايل بدون وجود كلمة السر.

وهي مُفعلة بشكل افتراضي على أجهزة أيفون، ومتاحة على أغلب أجهزة أندرويد -يستثنى من ذلك أجهزة HUAWEI- والصورة التالية توضح طريقة تفعيلها على موبايل أندرويد.

لتفعيلها على أندرويد، ابحث في اﻹعدادات عن Encrypt phone

ممكن الموبايل يطلب منك كلمة سر مختلفة للتشفير، وهيطلبها منك كل مرة يعاد تشغيل الموبايل.

إثبات الهوية الثنائي two factor authentication

ده معناه تسجيل الدخول Sign IN عن طريق مرحلتين، اﻷولى هي كتابة كلمة السر، والتانية عن طريق كلمة سر إضافية “متوافرة في كل الخدمات زي جوجل، فيسبوك، تويتر “. 

مهم! تفعيل الخاصية على واتساب: Settings – Account – Two-step Verification وبعدين بتكتب PIN من 6 أرقام.

واتساب هيتحقق من الكود ده كل فترة، أو في حالة إعادة تشغيل الموبايل، إعادة تثبيت البرنامج. 

شريحة الاتصال SIM

شريحة الاتصال SIM بنتعامل معاها كأنها ملكية خاصة، ولكن ده تعامل خاطئ، لانها تعتبر بمثابة إيجار من الشركة مقدمة الخدمة ليس أكثر، ويمكن بسهولة انتقالها لمستخدم تاني، أو سرقتها، أو الاطلاع على محتواها، عشان كدة مهم ناخد بالنا من النقاط دي

  • لازم تعمل pin لشريحة الاتصال، وده هتلاقيه في إعدادات الشريحة، وهيطلب منك كل مرة تعيد تشغيل الموبايل، أو تنقل الشريحة. 
  • متستخدمش شريحة الاتصال (رقمك) في أي حساب ليك (زي الفيسبوك، وتويتر، وجوجل)، فيه وسائل تانية أفضل عشان تعمل ده.

نصائح عامة

1لازم يكون عندك نسخة احتياطية من ملفاتك وصورك Always Backup, always save! وأحسن خدمة ممكن تساعدك في ده، هي خدمة Mega، بتديلك مجانًا 50 جيجا ومن أكثر الخدمات الآمنة على الانترنت، وتقدر تعمل مزامنة Sync على السحابة، واللابتوب، والموبايل

2لا يفضل استخدام وسائل التواصل العادية في مشاركة محتوى خاص، زي الصور أو الفيديو، ممكن نستخدم Signal، وفيه مميزات زي انه يمسح الرسالة بعد مدة معينة.

لغاية هنا نكون خلصنا الخطوات السهلة والمهمة من وجهة نظري، أكيد هكتب لاحقًا حاجات خفيفة ومهمة تانية.

لو محتاج/ة مساعدة، متتردوش تتواصلوا معايا :))

6 آراء على “أمان الموبايل في خطوات سهلة”

  1. شكرًا جزيلًا علي النصائح الهامة لكل المستخدمين، وأعتقد أنها بداية جيدة في التدوين
    أتمنى لك كل التوفيق والإستمرارية، وفي انتظار تدويناتك 🙂

اترك تعليقاً

لن يتم نشر عنوان بريدك الإلكتروني.