بالبيچاما – تمارين وحفلات وكورسات ببلاش من البيت (محدث)

من أيام اعتبرت منظمة الصحة العالمية “الكورونا covid19” وباء، وعليه كان من أهم النصائح هي إلغاء التجمعات للحد من إنتشار المرض، وبالفعل فيه دول شبه فرضت حظر تجوال، وألغت التجمعات للحد من إنتشار المرض.

بس التغيير المفاجئ في الروتين ده ممكن يكون صعب على ناس كتير، أنا منهم، وعشان كدة أنا بكتب التدوينة دي، فيها تجميعة عن عروض ممكن نستفيد منها، وحاجات نقضي فيها وقتنا خلال الفترة الحالية، والقائمة دي هتكون محدثة دايمًا، وهي بتضم (رياضة – شغل – تعليم – مزيكا – سينما – أكل 😀 )

استغل الوقت المتاح، وافتكر انه الفرص دي كلها مؤقتة، بلاش تأجيل 😀

نبدأ بأهم حاجة وهي صحتنا الجسدية، ومهم تركز هنا لانه حتى لو مش بتمارس رياضة بشكل منتظم، لازم تبدأ دلوقتي لانك قاعد في البيت ومفيش اي حركة بتعملها وده هيأثر سلبيًا على صحتك. 

وأسهل حاجة في النقطة دي هي الاشتراك في “الكوتش” وهو تطبيق موبايل لممارسة الرياضة في البيت، وبسبب اﻷزمة حاليًا فيه عرض للحصول على اشتراك شهر مجاني باستخدام برموموكود “StaySafe”  *لازم يكون معاك visa وهتدفع بس 2 جنيه رسوم app store.

نيجي للنقطة التانية الشغل، شركات كتير بدأت إنه الشغل يكون من البيت، لو لسه مبدأتش ومحتاج تعرف ازاي ممكن تخلي شغلك من البيت، أٌقرا “الدليل المختصر في التحول إلى العمل عن بُعد” وهو دليل سهل ومكتوب اﻷيام دي بسبب اﻷزمة، وكمان Google خلت Hangouts Meet video-conferencing مجانًا لمدة 3 شهور. 

وآخر نقطة في الجد، هي المذاكرة، وأهم حاجة فيها أنه موقع كورسيرا بيقدم حوالي 3800 دورة تعليمية مجانًا للطلاب لتفاصيل أكثر، ولغير الطلاب فيه دورات تعليمية متاحة مجانًا طول الوقت، ولو مهتم بالمواد اﻹعلامية زي المونتاج وصناعة اﻷفلام الوثائقية معهد الجزيرة للإعلام دوراته متاحة مجانًا حاليًا، ونيجي للبرمجة نلاقي محاضر اسمه Shawn Wildermuth أتاح الدورات اللي بيقدمها مجانًا وهي Bootstrap 4 و SignalR و Angular، وفي التسويق اﻹلكتروني Moaaz Mostafa هيوفر وقت لو حد محتاج مساعدة في ازاي يبدأ.
تحديث: فيه أكثر من 450 دورة تعليمية متاحة مجانًا من classcentral بالتعاون مع جامعات زي Harvard و Columbia.

تحديث: لو محتاج مساعدة في اﻹنجليزي فيه ناس جميلة على تويتر ممكن تساعدك، هنا و هنا، وهنا.

كدة خلصنا الحاجات المهمة ومحتاجين نرفه عن نفسنا شوية 😀  بس اﻷول لو محتاج مخبوزات أو مواد غذائية، متنزلش وخليك في البيت، واطلب من Breadfast وهما هيوصلوا كل احتياجات البيت من غير تكلفة توصيل.

نبدأ بالحفلات، عندنا مسار إجباري وتامر عاشور هيقدموا حفلات Live لسه المواعيد متحددتش خليكم متابعين، وROOM Art Space هيقدموا كل يوم تقريبًا حفلة Live الساعة 10 بليل، وعزيز مرقة و Mike Massy هيقدموا حفلة يوم الجمعة 20 مارس، ويوم السبت 21 مارس حفلة لسعد العود على يوتيوب.
تحديث: اﻷوبرا في باريس هتقدم عروض كل يوم من النهاردة، شوف الجدول من هنا.

لغاية لما الحفلات تبدأ ممكن نشوف فيلم، وهنا هنلاقي سينما زاوية هتقدم أفلام اونلاين، وأول فيلم متاح لمدة أسبوع هو “الفيلم الوثائقي”ميل يا غزيل” للمخرجة إليان”، وهنا فيه اقتراحات أكثر لمزيكا ومسلسلات وكتب. 
تحديث: وكمان شركة Abbout Productions من لبنان هتعرض كل 3 ايام فيلم من أفلامها مجانًا أونلاين.

تحديث: 10 متاحف ممكن تشوفهم أونلاين وأنت قاعد في البيت، ولو بتحب الفضاء Nasa وفرت مكتبة الصور والفيديو بشكل مفتوح للإطلاع عليهم.

للي بيحب الكوميكس ممكن تشوف أول 5 أعداد من مجلة توك توك مجانًا.

لو حاسس خلال اﻷزمة الحالية انك قلقان زيادة ممكن تحضر جلسة مجانية بتتعمل يوميًا للتعامل مع القلق والتوتر في الظروف الحالية، مقدمة من فريق Holding Space – Mental Health & Wellness. وكمان أقرا شوية “أفكار وتأملات شخصية حول كيفية إدارة المشاعر في ظل الظروف الحالية” 

التدوينة دي خلصت للنهاردة 😀 ولكن هتكون محدثة لو فيه اي اضافة جديدة يوميًا، وبما إنه كلنا تقريبًا بنستخدم الموبايل أغلب يومنا، وممكن يكون مصدر عدوى، شوف في الفيديو التالي من BBC ازاي تقدر تنضفه كويس، وخلي معلوماتك دايمًا من وزارة الصحة أو منظمة الصحة العالمية.

اترك تعليقاً

لن يتم نشر عنوان بريدك الإلكتروني.