تجربة تحضير برجر نباتي

تجربة البرجر النباتي

من أول لما بدأت اكون نباتي، البرجر كان من الحاجات اللي مفتقدها، والبدائل المتوافرة في اﻷول كانت قليلة ومحدودة، لكن زادت في 2020 وبقا فيه خيارات متنوعة ممكن بيها تأكل برجر بيتراوح سعره ما بين 40 جنيه لغاية 150 جنيه تقريبًا.

ورغم ده، تجربة البرجر منزليًا مختلفة وليها طعم مختلف، لأني ضامن المكونات أكثر وعاملها بأيدي، والتكلفة رخيصة جدًا، وبعد ما عملت البرجر، وغسلت كل اﻷطباق، حسيت بشعور ايجابي جميل :’D

الوقت المتوقع للوصفة هو حوالي 1 : 3 ساعات، حسب درجة التعود على المطبخ، والقدرة على انك تعمل/ي أكثر من حاجة في نفس الوقت.

الفهرس: المكونات – التحضيرات الجانبية – التحضيرات الاساسية – الطريق إلى البرجر – صور لمراحل التحضير.

أولًا – المكونات

  • 1 حبة بنجر (متوسطة)
  • 1 حبة بطاطس (متوسطة)
  • 1 حبة بصلة (متوسطة)
  • 3 كوب فول صويا مجروش (حوالي ربع كيلو) – من اي عطار
  • 2 معلقة كبيرة بذور كتان – من اي عطار / ابو عوف “ثمن كيلو بسعر 8ج”
  • 3 – 5 معلقة كبيرة توابل برجر – ابو عوف “بسعر 12 جنيه”
  • 6 – 10 معلقة كبيرة دقيق شوفان – ابو عوف “400 جم بسعر 40ج”

ثانيًا – التحضرات الجانبية

فيه خطوات مهمة نحضرها على جنب الاول، وهي فول الصويا، وجيل بذور الكتان.

فول الصويا ننقعه في شوية ماية “مغلية او عادية” بإضافة 3 معلقة كبيرة خل، ومرقة خضار. لمدة 15 دقيقة، وبعدها نحاول نصفيه من الماية ونعصره شوية. “على قد ما نقدر مش هيصفى تمامًا”

جيل بذور الكتان نجيب كنكة مثلًا ونحط فيها ربع كوباية ماية وعلى نار متوسطة، ولما تسخن شوية نحط معلقتين كبار بذور كتان، ونقلب كويس على النار حوالي 3 -5 دقائق، وبعدين نصفي السائل اللي هيطلع. وهو ده “الجيل” اللي هنستخدمه. وفيه فيديو للطريقة من ياسمين.


ثالثًا – التحضيرات اﻷساسية

  1. حبة البطاطس، نقطعها مكعبات ونسلقها وبعد السلق نهرسها.
  2. حبة البنجر، نقطعها مكعبات صغيرة ونسلقها.
  3. حبة البصل، نقطعها مكعبات صغيرة.

رابعًا – الطريق إلى البرجر

وأخيرًا وصلنا للخطوة اﻷخيرة وهي عبارة عن خلط للكل المكونات.

اﻷول هناخد البصل ونشوحه في 3 معالق زيت في تيفال على نار متوسطة، لغاية لما البصل يستوي تمامًا – مبحبش البصل في اﻷكل بس محسيتش بيه في البرجر نهائي- وهي النار لسه شغالة هنروح للنقطة التانية.

ثانيَا هنضيف فول الصويا على البصل ونقلبه، وبعدين نضيف البنجر والبطاطس المهروسة ونقلبهم كلهم سوا لمدة 3-4 دقائق، وبعدين نطفي النار ونسيب المزيج يهدى 10 دقائق.

ثالثًا هنروح لمحضر الطعام Food Processor ونحط فيه المزيج، ونضيف عليه “جيل بذور الكتان” + 6 معلقة دقيق شوفان + 3 معلقة توابل برجر، ونشغل محضر الطعام.

وممكن في المرحلة دي نزود معلقة دقيق شوفان كل شوية عند الحاجة لغاية لما نحس انه المزيج بقا متماسك كفاية.

رابعًا وأخيرًا، نشكل قطع البرجر في علبة حفظ طعام، وممكن نفصل بين كل طبقة من قطع البرجر بورق زبدة عشان ميلزقش في بعضه في الفريزر.

بس كدة الوصفة خلصت :’) في اي وقت نطلع البرجر من الفريزر ونقليه او ممكن في الفرن، وبالهنا والشفا.

الوصفة اﻷصلية نٌشرت للمرة اﻷولى في جروب فيجان مصر، وساعدني في اني اطبق الوصفة وتطلع حلوة معايا سارة، شكرًااااا يا سارة.


رأي واحد على “تجربة تحضير برجر نباتي”

اترك تعليقاً

لن يتم نشر عنوان بريدك الإلكتروني.