بعد سنتين، ليه أنا نباتي؟

بعد سنتين، ليه أنا نباتي؟

النهاردة أنا كملت سنتين نباتي Vegetarian، مباكلش أي لحوم أو أسماك، ومؤخرا بحاول أقطع تمامًا المنتجات الحيوانية زي اﻷلبان والبيض، والمنتجات اللي داخل في صناعتها أثر حيواني زي بعض منتجات العناية الشخصية، أو الملابس.

في التدوينة دي انا هحاول أجمع افكاري واقول ليه انا عملت كدة، وليه شايف ده مهم، ومستني أوصل لفين تاني؟

في 2016 كانت أول مرة أخد بالي من جروب PBD Egypt وهو نظام صحي بيقطع أي منتجات حيوانية، أو منتجات مُعلبة ومُعالجة باﻹضافة للزيوت، وتحمست اني اجرب النظام وجربته بالفعل 3 شهور وكان الموضوع لذيذ، لغاية لما نزلت شغل وبقى صعب أحضر اكل ورجعت أكل عادي تاني.

في 2018 بدأ الموضوع يجي في بالي تاني، وقررت اني أبدا الموضوع تدريجيًا لانه صعب أعرف احضر اكل وانا بروح الشغل كل يوم، فقررت أبقى نباتي، وبعدين “نباتي صرف” وبعدين “خضري PBD”

وبدأت بالفعل، وكان الدافع ورا الموضوع صحي مش أكثر، ولكن فضلت أكسل احضر أكل مخصوص، وفضلت استهلك أكل نباتي سريع! يعني السبب الصحي مبقاش شغال هنا يا مولانا، وخلال الفترة دي حصل شوية تغييرات هي اللي خلتني اكمل برغم انه الدافع اﻷساسي الصحي سقط خلاص!

ماذا حدث؟ خلال الفترة اﻷولى ليا كنباتي، انا كنت بتابع صفحات النباتية، وفي نفس الوقت انا كان بدأ ينمو جوايا إهتمام بيئي، وقعدت أقرأ أكثر عن البيئة.

من خلال متابعتي بدأت رؤيتي تتغير شوية للحيوانات والبيئة، وأكتشفت الأضرار اللي بنتسبب فيها لكل جزء من البيئة حولنا، واللي ممكن ألخصه في النقاط دي:

  • الصناعة الحيوانية بشعة ومليانة تعذيب وحاجات كتير أعجز اني اوصفها او الخصها لاني عمري ما قدرت اكمل أي وثائقي بيوضح الموضوع.
  • في عصرنا الحالي، متوافر لينا موارد كتير وأغذية كتير ونقدر نعيش كويس من غير حيوانات، إذا ليه أكون مشارك في المعاناة؟ – شوف فيلم the game changer
  • الصناعة الحيوانية من المساهمين الكبار في التغيير المناخي اللي بيحصل، و هنا أداة من BBC بتوضح لك آثار كل نوع من اﻷكل اللي بناكله. 

هل كل ده مهم ومؤثر؟ 

بالرغم من انه انا مقتنع انه اي حاجة مهما كانت صغيرة فهي مؤثرة، بس مش ده الدافع المحرك ليا، ولكن رغبتي في اني مكونش مضر أو مؤذي أو مساهم في ده بقدر اﻹمكان.

وشايف انه طالما توافر عندي بديل فانا واجب عليا اني اختاره حتى لو هو أصعب ومحتاج مجهود وتغيير عادات.

حاسس بايه بعد سنتين، ومستني أوصل فين؟

مبسوط اني استمريت كل ده، بس بامل الفترة الجاية اني اكون نباتي صرف تمامًا، واني استثمر وقت في الركيز على العادات الصحية، وأكون حاسب أكلي وفاهم اختياراتي كويس.

أسئلة وانتقادات مفتوحة – ممكن أدون عنها لاحقًا –

  • اللحوم حلال فهي أكيد مش مضرة
  • الصناعة دي ضخمة والبشر كلهم أكيد مش هيبطلوا فانا اكيد مش مؤثر
  • طب ما النباتات بتشعر بالآلم! -دي بالذات عمري ما هرد عليها-
  • صناعة المكسرات فيه استبداد وظلم، ليه بتاكلها؟

لغاية هنا أنا خلصت دردشة سريعة مُختصرة عن الموضوع، ممكن لاحقًا أتكلم عن حاجات معينة أكثر، ولو عندكم سؤال او رأي ممكن تسيبوه في الكومنتات تحت، وأهلا بيكم 🙂

رأيان على “بعد سنتين، ليه أنا نباتي؟”

  1. مبروك عليك سنتين بدون أذى لحيوان واتمنى تقدر تكون نباتي صرف قريب، وكل السلاحف بتحبك.

اترك تعليقاً

لن يتم نشر عنوان بريدك الإلكتروني.